مرسر چٹان کے اس سفر میں میرے ہمراہ حسین آباد کے نذیر بھائی اور عارف شاہ تھے۔ نذیر بھائی  سے میرا احترام اور شفقت  کا تعلق ہے۔ ان سے پہلی ملاقات موسم سرما میں  سکردو کے ایک سفر کے دوران ہوئی جو ہم نے 2020 کی سردیوںمیں کیا تھا۔ عارف شاہ سے بھی چند سال قبل ملاقات ہوچکی تھی جب ہم موسم سرما میں اس کے ہمراہ حسین آباد کی سیاحت کے لیےگئے تھے۔

ہم نے مرسر چٹان کی طرف اپنا پیدل سفر 08:15 بجے شروع کیا۔ چونکہ سفر چڑھائی کا تھا لہٰذا آغاز میں مشکل پیش آئی۔ لیکن جیسے جیسے ہم اوپر چڑھتے گئے ہمارے بدن چڑھائی کے عادی ہونے لگے۔ کم وبیش 45 منٹ پیدل سفر کے بعد ہم کیمپ 01 پر پہنچے۔ اگرچہ ہم راستے میں وقفے لیتے آئے تھے جن کا دورانیہ 30 سیکنڈ سے 2 منٹ تک ہوتا تھا۔ کیمپ 01 پر 10 منٹ آرام کیا۔ سانسوں کی الجھی ڈور سلجھا کر پھر چل پڑے۔ ہمارے سامنے مختلف چٹانیں واضح ہونا شروع ہوگئیں۔ جیسے جیسے اوپر چڑھتے گئے عمیق وادی اور پہاڑوں کے درمیان دریائے سندھ کے مناظر دلکش ہونے لگے۔ آج کل موسم سرما کے آخری دن تھے۔ گزشتہ دو روز سے پہاڑوں کی چوٹیوں پر برفباری کا سلسلہ جاری تھا۔ کیمپ 01 سے روانہ ہوئے توجلد ہی ہم آہستہ آہستہ اس مقام تک پہنچ گئے جہاں سے آگے جگہ جگہ برف تھی۔ برف پر چلنے سے کرچ کرچ کی خوبصورت آواز پید ا ہوتی تھی۔ چند ایک عمودی چٹانیں چڑھیں ۔ اب اوپر کیمپ 02 نظر آرہا تھا۔

کیمپ 01 سے کیمپ 02 تک کا فاصلہ ہم نے 30 منٹ میں طے کرلیا۔ یہاں بھی 10 منٹ کے لیے رکے اور بدن کو آرام فراہم کیا۔ کیمپ 02 سے مرسر چٹان تک بعض مقامات پر عمودی چٹانوں  پر چڑھنا پڑا۔ چند مختلف الاشکال چٹانوں کی عکس بندی کی۔ میں ایک چٹان پر سانس درست کرنے کے لیے بیٹھا ہوا تھا کہ انور بھائی ساکن سرمک کی فون کال آگئی۔ ان سے دس منٹ کی بات چیت میں مجھے پورا زور لگا کر بولنا پڑا۔ ایک تو ہوا بہت تیز تھی دوسرے سگنل کمزور تھے جس کی وجہ سے دوسری طرف میری آواز کم سنائی دے رہی تھی۔ اس کانقصان مجھے یہ ہوا کہ میرا گلا خشک ہوگیا۔ نذیر بھائی اور عارف میرے قریب سے گزر کر اوپر جاچکے تھے۔ لہٰذا میں بھی روانہ ہوگیا اور مزید 30 منٹ کے سفر کے بعد مرسر چٹان پر پہنچ گیا۔مرسر چٹان تک پہنچنے میں ہمارا سوا دوگھنٹے کا کل وقت صرف ہوا۔

 مرسر چٹان کی سطح سمندر سے بلندی کم و بیش 11400 فٹ ہے۔ یہ ایک بڑی چٹان ہے جس کا 8تا 10 فٹ کا حصہ ہوا میں معلق ہے۔ جوں جوں چٹان باہر نکلتی جاتی ہے اس کی چوڑائی کم ہوتی جاتی ہے اور اختتام پر ایک نوکدار شکل اختیار کر لیتی ہے۔ یہاں سے نیچے دیکھیں تو سر چکراتا ہے۔ ہزاروں فٹ کی گہرائی منہ کھولے ہوئے ہے۔ ہائیٹ فوبیا کے شکار افراد اس سے اجتناب ہی کریں تو بہتر ہے۔

مرسر چٹان سے نیچے دیکھیں تو حسین آباد کا علاقہ نظر آتا ہے۔شاہراہِ کارگل سکردو کے پار بل کھاتا ہوا  دریائے سندھ ایک دلفریب منظر پیش کرتا ہے۔ سفید ریت میں اس کے زمرد پانی بلا شبہ قدرت کے حسین رنگ ظاہر کرتے ہیں۔ دریا  کے پار مشہور و معروف سرفرنگا صحراء پھیلا ہوا ہے۔ ذرا  دائیں طرف اسی صحراء میں وادی شگر کی طرف راستہ جاتا ہے جو ایک پختہ سڑک ہے۔ سفید ریت میں سیدھی سیاہ سڑک یوں معلوم ہوتی ہے گویا ایک صفحے پر پیمانے سے سیاہ لکیر کھینچ دی گئی ہو۔ یہ سڑک پہاڑوں میں داخل ہوجاتی ہے اور پھر ان پہاڑوں کے پارشگر شہر میں جانکلتی ہے۔صحراء کے درمیان شاہراہ پر تعمیر کیا گیا بابِ شگر بھی دکھائی دیتا ہے۔ مرسر چٹان سے شگر شہر کا نظارہ بھی کیا جاسکتا ہے۔

مرسر چٹان سے بائیں طرف نگاہ دوڑائیں تو سکردو شہر کا نظارہ بھی قابل دید ہے۔ یہاں سے نہ صرف کھرڈونگ پہاڑی پر واقع قلعہ کھرپوچوئے ، کٹپنا صحراء اور کٹپنا صحراءکے ساتھ دریائے سندھ کے پار کواردو دکھائی دیتا ہے بلکہ سکردو کے بین الاقوامی ہوائی اڈے کی ہوائی پٹی بھی نظر آتی ہے۔ مزید بائیں طرف سکردو شہر کے پہریدار یعنی بلند پہاڑ سر اٹھائے کھڑے ہے۔

تمام اطراف کی عکس بندی  اور ایک گھنٹہ مرسر چٹان پر قیام کے بعد ہم نے واپسی کا قصد کیا۔چڑھائی اگر سیر تھی تو اترائی سوا سیر۔ ہمارے بدن چڑھائی کے سفر سے تھرتھراہٹ کا شکار تھے۔ واپسی کے سفر میں چند مختلف الاشکال چٹانوں کی عکس بندی کی اور کم و بیش دو گھنٹے پیدل سفر کے بعد ہم واپس  گوما 01 پہنچ گئے۔ پہنچتے ہی گھاس کے قطعہ پر یوں لیٹ گئے گویا اب شام  کے بعد ہی اٹھیں گے لیکن واپسی کا سفر تو کرنا تھا۔ حسین آباد پہنچ کر بغیر کسی وقفہ کے اپنی موٹر سائیکل کا رخ سکردو کی طرف کیا اور  بعد ازدوپہر واپس اپنی قیام گاہ پہنچ گیا۔